ನಟ ಯಶ್‌ಗೆ ಹೈಕೋರ್ಟ್ ರಿಲೀಫ್: ಐಟಿ ನೋಟಿಸ್ ರದ್ದು

ಅಪರಾಧಕ್ಕೆ ಸವಾಲು ಕನ್ನಡ ದಿನಪತ್ರಿಕೆ

ಬೆಂಗಳೂರು: ನಟ ಯಶ್‌ ಅವರಿಗೆ ಆದಾಯ ತೆರಿಗೆ ಇಲಾಖೆಯಿಂದ 2013–19ರ ಅವಧಿಯ ಹಣಕಾಸು ವ್ಯವಹಾರಕ್ಕೆ ಸಂಬಂಧಿಸಿ ನೀಡಲಾಗಿದ್ದ ನೋಟಿಸ್‌ ಅನ್ನು ಕರ್ನಾಟಕ ಹೈಕೋರ್ಟ್‌ ರದ್ದು ಮಾಡಿದ್ದು, ಯಶ್‌ಗೆ ದೊಡ್ಡ ಮಟ್ಟದ ರಿಲೀಫ್‌ ದೊರಕಿದೆ.

ಹೊಂಬಾಳೆ ಕನ್‌ಸ್ಟ್ರಕ್ಷನ್ಸ್‌ ಸಂಬಂಧಿಸಿದ ತನಿಖೆಯ ವೇಳೆ ಯಶ್‌ ವಾಸಿಸಿದ ಮನೆ ಹಾಗೂ ಅವರು ಬಾಡಿಗೆಗೆ ತಂಗಿದ್ದ ತಾಜ್ ವೆಸ್ಟ್ ಎಂಡ್‌ ಕೊಠಡಿಗೂ ಶೋಧ ನಡೆಸಲಾಗಿತ್ತು. ಆದರೆ ‘ಶೋಧನೆಗೊಳಗಾಗದ ವ್ಯಕ್ತಿಗೆ ನೀಡುವ’ ನೋಟಿಸ್‌ನ್ನು ಯಶ್‌ ಪ್ರಶ್ನಿಸಿದ್ದರು. ಹೈಕೋರ್ಟ್‌ ಅವರು ಮಂಡಿಸಿದ ವಾದಗಳನ್ನು ಪರಿಗಣಿಸಿ ನೋಟಿಸ್‌ ರದ್ದುಗೊಳಿಸಿದೆ.

ಚಿತ್ರರಂಗದ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದ ನಟ ಯಶ್‌ (Yash) ಅವರಿಗೆ ನ್ಯಾಯಾಲಯದ ಈ ತೀರ್ಪು ದೊಡ್ಡ ಪರಿಹಾರ ತಂದಿದೆ. 2013–14ರಿಂದ 2018–19ರವರೆಗಿನ ಅವರ ಹಣಕಾಸು ದಾಖಲೆಗಳ ಕುರಿತು ಆದಾಯ ತೆರಿಗೆ ಇಲಾಖೆ ನೀಡಿದ ನೋಟಿಸ್‌ ವಿರುದ್ಧ ಯಶ್‌ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದರು. ನ್ಯಾಯಮೂರ್ತಿ ಎಸ್‌.ಆರ್‌. ಕೃಷ್ಣಕುಮಾರ್ ಅವರಿದ್ದ ಪೀಠ ಈ ನೋಟಿಸ್‌ ಕಾನೂನುಬಾಹಿರವೆಂದು ಪರಿಗಣಿಸಿ ರದ್ದು ಮಾಡುವ ಆದೇಶ ನೀಡಿದೆ.

ಹೊಂಬಾಳೆ ಕನ್‌ಸ್ಟ್ರಕ್ಷನ್ಸ್‌ ಸಂಸ್ಥೆಗೆ ಸಂಬಂಧಿಸಿ ಐಟಿ ಇಲಾಖೆ ನಡೆಸಿದ ಪರಿಶೀಲನೆಯ ವೇಳೆಯಲ್ಲಿ ಯಶ್‌ ಹೊಸಕೆರೆಹಳ್ಳಿಯ ಮನೆ ಹಾಗೂ ತಾಜ್‌ ವೆಸ್ಟ್ ಎಂಡ್‌ನಲ್ಲಿ ಅವರು ನೆಲೆಸಿದ್ದ ಕೊಠಡಿ ಶೋಧನೆಗೊಳಪಟ್ಟಿತ್ತು. 2021ರಲ್ಲಿ ಆದಾಯ ತೆರಿಗೆ ಕಾಯ್ದೆ ಸೆಕ್ಷನ್ 153(ಸಿ) ಅಡಿ ನೀಡಲಾಗಿದ್ದ ನೋಟಿಸ್‌ನ್ನು ಯಶ್ ಪ್ರಶ್ನಿಸಿದ್ದರು. ‘ತಮ್ಮ ನಿವಾಸವೇ ಶೋಧಿಸಲಾಗಿದೆ. ಆದರೂ ಶೋಧ ನಡೆಸದೆ ಇರುವವರಿಗೆ ನೀಡುವ 153(ಸಿ) ನೋಟಿಸ್‌ ನೀಡಿರುವುದು ಕಾನೂನುಬಾಹಿರ’ ಎಂದು ಯಶ್ ಪರ ವಕೀಲರು ವಾದಿಸಿದ್ದರು.

‘ಹೊಂಬಾಳೆ ಕನ್‌ಸ್ಟ್ರಕ್ಷನ್ಸ್‌ನ ವಿಜಯ್‌ಕುಮಾರ್‌ ವಿರುದ್ಧ ಶೋಧನೆ ವಾರಂಟ್‌ ಪಡೆದಿದ್ದೇವೆ. ಹೊಂಬಾಳೆಗೆ ಸಂಬಂಧಪಟ್ಟ ದಾಖಲೆಗಳಿಗಾಗಿ ಮಾತ್ರ ಯಶ್‌ ನಿವಾಸವನ್ನು ಪರಿಶೀಲಿಸಲಾಗಿದೆ. ಹೀಗಾಗಿ ಯಶ್‌ ಶೋಧನೆಗೊಳಗಾದ ವ್ಯಕ್ತಿಯಲ್ಲ’ ಎಂದು ಐಟಿ ಇಲಾಖೆ ವಾದ ಮಂಡಿಸಿತ್ತು. ವಾದ–ಪ್ರತಿವಾದಗಳನ್ನು ಪರಿಶೀಲಿಸಿದ ಹೈಕೋರ್ಟ್ ಯಶ್‌ಗಳಿಗೆ ನೀಡಿದ್ದ ನೋಟಿಸ್‌ ರದ್ದು ಮಾಡುವಂತೆ ಆದೇಶಿಸಿದೆ.

ಈ ನಡುವೆ ಯಶ್‌ ‘ಟಾಕ್ಸಿಕ್’ ಮತ್ತು ‘ರಾಮಾಯಣ’ ಚಲನಚಿತ್ರಗಳ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದು, ಎರಡೂ ಚಿತ್ರಗಳ ಮೇಲೂ ಅಭಿಮಾನಿಗಳ ನಿರೀಕ್ಷೆ ಹೆಚ್ಚಿದೆ. ‘ಟಾಕ್ಸಿಕ್’ ಚಿತ್ರದ ಶೂಟಿಂಗ್‌ ಇತ್ತೀಚೆಗೆ ಪೂರ್ಣಗೊಂಡಿದ್ದು, ಸಿನಿಮಾ ಮಾರ್ಚ್‌ 19ರಂದು ವಿಶ್ವ ಮಟ್ಟದಲ್ಲಿ ಬಿಡುಗಡೆಯಾಗಲಿದೆ.