ಸಿಎಂ- ಡಿಕೆಶಿ ಒನ್ ಟು ಒನ್ ಮೀಟಿಂಗ್ ಶುರು
ಅಪರಾಧಕ್ಕೆ ಸವಾಲು ಕನ್ನಡ ದಿನಪತ್ರಿಕೆ
ಬೆಂಗಳೂರು: ರಾಜ್ಯ ರಾಜಕೀಯದಲ್ಲಿ ನಾಯಕತ್ವ ಬದಲಾವಣೆಯ ಚರ್ಚೆ ತಾರಕಕ್ಕೇರಿರುವ ನಡುವೆಯೇ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಇಂದು ಮುಖಾಮುಖಿಯಾಗಿದ್ದು, ಸಿಎಂ ಕಾವೇರಿನಿವಾಸದಲ್ಲೇ ಬ್ರೇಕ್‌ಫಾಸ್ಟ್‌ ಕೂಟ ನಡೆದಿದೆ. ಡಿಕೆಶಿ ಆಗಮಿಸುತ್ತಿದ್ದಂತೆಯೇ ಸಿದ್ದರಾಮಯ್ಯ ಆತ್ಮೀಯವಾಗಿ ಸ್ವಾಗತಿಸಿ ಒಳಗೆ ಆಹ್ವಾನಿಸಿದ್ದಾರೆ.
ಸ್ಪೆಷಲ್‌ ರೂಮ್‌ನಲ್ಲಿ ಇಬ್ಬರೂ ಕುಳಿತು ಉಪಹಾರ ಸೇವಿಸಿದ ಬಳಿಕ ಒನ್–ಟು–ಒನ್ ಚರ್ಚೆ ಆರಂಭವಾಗಿದ್ದು, ಇತರರಿಗೆ ಪ್ರವೇಶ ನಿರ್ಬಂಧಿಸಲಾಗಿದೆ. ಈಗ ಕಾಂಗ್ರೆಸ್ ಒಳಜಗಳದ ರಾಜಕೀಯ ಮೆನುನಲ್ಲಿ ‘ಕಾರಾಬಾತ್ ಸಿಗುವವರು ಯಾರು? ಕೇಸರಿ ಬಾತ್ ಸಿಗುವವರು ಯಾರು?’ ಎಂಬ ಕುತೂಹಲಕಾರಿ ಪ್ರಶ್ನೆಗೆ ಉತ್ತರ ಈ ಭೇಟಿಯ ಬಳಿಕ ಸ್ಪಷ್ಟವಾಗಲಿದೆ ಎಂದು ವಲಯಗಳಲ್ಲಿ ಚರ್ಚೆ.
- ಬಿಗಿ ಭದ್ರತೆ
ಸಿಎಂ–ಡಿಸಿಎಂ ಮಾತುಕತೆ ಹಿನ್ನೆಲೆಯಲ್ಲಿ ಕಾವೇರಿ ನಿವಾಸದ ಸುತ್ತ ಮುತ್ತ ಭದ್ರತೆ ಹೆಚ್ಚಿಸಲಾಗಿದೆ. ಹೆಚ್ಚುವರಿಯಾಗಿ 3 ಕೆಎಸ್‌ಆರ್‌ಪಿ ತುಕಡಿ, 2 ಬಸ್ ಸಿಬ್ಬಂದಿ ನಿಯೋಜನೆಯಾಗಿದ್ದು, ಯಾವುದೇ ಅನಾವಶ್ಯಕ ಚಟುವಟಿಕೆ ನಡೆಯದಂತೆ ಪೊಲೀಸರು ಎಚ್ಚರಿಕೆಯಿಂದ ನಿಂತಿದ್ದಾರೆ.
- ಹೈಕಮಾಂಡ್ ಆದೇಶವೇ ಮೀಟಿಂಗ್‌ಗೆ ಕಾರಣ?
ಪಕ್ಷದ ಉನ್ನತ ವಲಯಗಳ ಪ್ರಕಾರ, ಈ ಬ್ರೇಕ್‌ಫಾಸ್ಟ್‌ ಮೀಟಿಂಗ್ ಹೈಕಮಾಂಡ್ ಸಂದೇಶದ ಮೇರೆಗೆ ಆಯೋಜನೆಯಾಗಿದೆ.
“ಕರ್ನಾಟಕ ನಾಯತ್ವ ಬದಲಾವಣೆ ಕುರಿತ ಉದ್ವಿಗ್ನತೆಯನ್ನು ನೀವು ಇಬ್ಬರೂ ಕುಳಿತು ಬಗೆಹರಿಸಿಕೊಳ್ಳಿ. ತೀರ್ಮಾನಕ್ಕೆ ಬರದಿದ್ದರೆ, ದೆಹಲಿ ಆಹ್ವಾನ ಕಡ್ಡಾಯ,” ಎಂಬ ಕಟ್ಟಾಜ್ಞೆಯನ್ನು ರಾಹುಲ್ ಗಾಂಧಿ ನೀಡಿದ್ದಾರಂತೆ. ಇದೇ ಹಿನ್ನೆಲೆಯಲ್ಲಿ ನವೆಂಬರ್ 29ರ ಈ ವಿಶೇಷ ಸಭೆ ಕರೆಯಲಾಗಿದೆ ಎಂಬುದು ಪಕ್ಷದ ಮೂಲಗಳ ಹೇಳಿಕೆ.
ಕುತೂಹಲ ಗರಿಗೆದರಿಸಿದ ಬ್ರೇಕ್‌ಫಾಸ್ಟ್‌ ಮೀಟಿಂಗ್
ಸಿದ್ದರಾಮಯ್ಯ ಸ್ವತಃ ಕೆಲ ಮಾಧ್ಯಮಗಳೊಂದಿಗೆ ಮಾತನಾಡುವ ವೇಳೆ “ಹೈಕಮಾಂಡ್ ಸೂಚನೆ ಇದ್ದುದರಿಂದಲೇ ಈ ಮೀಟಿಂಗ್,” ಎಂದು ಹೇಳಿರುವುದಾಗಿ ವರದಿಯಾಗಿದೆ.
ರಾಜ್ಯ ಕಾಂಗ್ರೆಸ್‌ನಲ್ಲಿ ನಡೆಯುತ್ತಿರುವ ಅಧಿಕಾರ ಹಂಚಿಕೆ, ನಾಯಕತ್ವ ಸ್ಪರ್ಧೆ, ಗೊಂದಲಕ್ಕೆ ಇಂದು ಬಹುತೇಕ ತೆರೆ ಬೀಳುವ ಸಾಧ್ಯತೆ ಇರುವುದರಿಂದ ಈ ಸಭೆ ರಾಜ್ಯ ರಾಜಕೀಯ ವಲಯದಲ್ಲಿ ಭಾರಿ ಕುತೂಹಲ ಹುಟ್ಟುಹಾಕಿದೆ.
