ಐಪಿಎಸ್ ಅಧಿಕಾರಿ ಅಂಶು ಕುಮಾರ್ ನೇತೃತ್ವದಲ್ಲಿ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ದಾಳಿ
ಅಪರಾಧಕ್ಕೆ ಸವಾಲು ಕನ್ನಡ ದಿನಪತ್ರಿಕೆ
ಬೆಂಗಳೂರು: ಪರಪ್ಪನ ಅಗ್ರಹಾರ ಜೈಲಿನಲ್ಲಿ ನಿಷೇಧಿತ ವಸ್ತುಗಳ ಸಾಗಾಟ–ಬಳಕೆ ಇನ್ನೂ ನಿಲ್ಲದ ಸ್ಥಿತಿಯಲ್ಲಿದೆ. ಐಸಿಸ್ ಉಗ್ರ ಹಾಗೂ ಸರಣಿ ಕೊಲೆಪಾತಕಿ ಸೇರಿದಂತೆ ಕೆಲವು ಕೈದಿಗಳ ಮೊಬೈಲ್ ಬಳಕೆ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಅಧಿಕಾರಿಗಳು ಮಂಗಳವಾರ ತಪಾಸಣೆ ನಡೆಸಿ ಸಜಾಬಂಧಿಗಳಿಂದ 19 ಮೊಬೈಲ್ ಫೋನ್‌ಗಳು ಪತ್ತೆಹಚ್ಚಿದ್ದಾರೆ.
ಐಪಿಎಸ್ ಅಧಿಕಾರಿ ಅಂಶು ಕುಮಾರ್ ನೇತೃತ್ವದಲ್ಲಿ ನಡೆದ ದಾಳಿಯಲ್ಲಿ 16 ಸಿಮ್ ಕಾರ್ಡ್‌, 4 ಚಾರ್ಜರ್ ವೈರ್, 3 ಇಯರ್ ಬಡ್ಸ್ ಹಾಗೂ ₹15,800 ನಗದು ವಶಪಡಿಸಿಕೊಳ್ಳಲಾಗಿದೆ.
ಈ ಸಂಬಂಧ ಕೆಲ ಸಜಾಬಂಧಿಗಳ ವಿರುದ್ಧ ಕರ್ನಾಟಕ ಕಾರಾಗೃಹ (ತಿದ್ದುಪಡಿ) ಅಧಿನಿಯಮದ ಕಲಂ 22 ಸೇರಿ ವಿವಿಧ ಕಲಂಗಳಡಿ ಎರಡು ಪ್ರಕರಣಗಳು ದಾಖಲಿಸಲಾಗಿದೆ ಎಂದು ಜೈಲಾಧಿಕಾರಿಗಳು ತಿಳಿಸಿದ್ದಾರೆ.
- ಹಾಸಿಗೆ–ದಿಂಬು, ಶೌಚಾಲಯದ ಗೋಡೆಯಲ್ಲೇ ಮೊಬೈಲ್
ನವೆಂಬರ್ 26ರ ಮಧ್ಯರಾತ್ರಿ 12.50ರಿಂದ 1.25 ರವರೆಗೆ ನಡೆದ ತಪಾಸಣೆಯಲ್ಲಿ ವಿವಿಧ ಬ್ಯಾರಕ್ಕಿನ ಕೊಠಡಿಗಳಿಂದ 15 ಮೊಬೈಲ್ ಫೋನ್‌ಗಳು, 11 ಸಿಮ್ ಕಾರ್ಡ್‌ಗಳು ಹಾಗೂ ಇನ್ನಿತರ ನಿಷೇಧಿತ ವಸ್ತುಗಳು ಪತ್ತೆಯಾದವು.
• ಸಜಾಬಂಧಿ ಸಾಗರ್ (ಅಲಿಯಾಸ್ ರಕೀಬುಲ್ಲಾ) ಹಾಸಿಗೆಯಲ್ಲಿ OnePlus ಫೋನ್ ಹಾಗೂ ಸಿಮ್ ಪತ್ತೆ
• ಸಜಾಬಂಧಿ ಮುನಿರಾಜು ದಿಂಬಿನಲ್ಲಿ Redmi ಮೊಬೈಲ್ ಹಾಗೂ ಸಿಮ್ ಪತ್ತೆ
• 5ನೇ ಬ್ಯಾರಕ್ ಶೌಚಾಲಯ ಮಾರ್ಗದ ಕಮಾನುಗಳ ಮೇಲೆ 2 ಚಾರ್ಜರ್ ವೈರ್ ಮತ್ತು ಒಂದು ಇಯರ್‌ಬಡ್ ವಶ
- ದಾಳಿಯಲ್ಲಿ ಇನ್ನೂ 4 ಮೊಬೈಲ್ ವಶ
ನ. 26ರ ಬೆಳಗ್ಗೆ 7.20ರಿಂದ 7.50ರವರೆಗೆ ನಡೆದ ಮತ್ತೊಂದು ತಪಾಸಣೆ ವೇಳೆ 4 ಮೊಬೈಲ್‌ಗಳು, 5 ಸಿಮ್ ಕಾರ್ಡ್‌ಗಳು ಹಾಗೂ ₹15,800 ನಗದು ಕೈಗೆ ಸಿಕ್ಕಿವೆ.
ನಿಷೇಧಿತ ವಸ್ತುಗಳನ್ನು ಜೈಲಿಗೆ ಒಳಗೆ ತರಲು ಯಾರು ನೆರವಾದರು, ಕೊನೆಗೆ ಈ ಮೊಬೈಲ್‌ಗಳನ್ನು ಬಳಸುತ್ತಿದ್ದ ಕೈದಿಗಳು ಯಾರು ಎಂಬುದರ ಬಗ್ಗೆ ತನಿಖೆ ಮುಂದುವರೆದಿದ್ದು, ಎರಡು ಪ್ರತ್ಯೇಕ ಎಫ್‌ಐಆರ್‌ಗಳು ದಾಖಲಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.
