ಇಡಿ ಬಲೆಯಲ್ಲಿ ವಿನ್‌ಜೋ ಸಂಸ್ಥಾಪಕ
ಅಪರಾಧಕ್ಕೆ ಸವಾಲು ಕನ್ನಡ ದಿನಪತ್ರಿಕೆ
ಬೆಂಗಳೂರು: ಆನ್‌ಲೈನ್‌ ಗೇಮಿಂಗ್‌ ಪ್ಲಾಟ್‌ಫಾರ್ಮ್‌ ‘ವಿನ್‌ಜೋ’ ಸಂಸ್ಥಾಪಕರಾದ ಸೌಮ್ಯಸಿಂಗ್‌ ರಾಥೋಡ್‌ ಮತ್ತು ಪಾವನ್‌ ನಂದಾ ಅವರನ್ನು ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಜಾರಿ ನಿರ್ದೇಶನಾಲಯ (ಇಡಿ) ಬಂಧಿಸಿದೆ.
ನವೆಂಬರ್ 18ರಿಂದ 22ರವರೆಗೆ ವಿನ್‌ಜೋ ಮತ್ತು ಅದರ ಅಂಗಸಂಸ್ಥೆ ಗೇಮ್ಜ್‌ಕ್ರಾಫ್ಟ್ ಕಛೇರಿಗಳ ಮೇಲೆ ಇಡಿ ದಾಳಿ ನಡೆಸಿತ್ತು. ತನಿಖೆಯಲ್ಲಿ ಅಕ್ರಮ ಆದಾಯ ಸಂಗ್ರಹಿಸಿರುವುದು ಪತ್ತೆಯಾಗಿದ್ದು, 505 ಕೋಟಿ ರೂ. ಆಸ್ತಿಗಳನ್ನು ಜಪ್ತಿಮಾಡಲಾಗಿತ್ತು. ಈ ದಾಳಿಯ ಮುಂದುವರಿಕೆಯಲ್ಲಿ ಇಬ್ಬರು ಸಂಸ್ಥಾಪಕರನ್ನು ಬುಧವಾರ ರಾತ್ರಿ ಬಂಧಿಸಲಾಯಿತು.
ನಂತರ ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ ಪೊಲೀಸರು, 1 ದಿನದ ಇಡಿ ಕಸ್ಟಡಿ ಪಡೆದಿದ್ದಾರೆ.
- ಗ್ರಾಹಕರ ಹಣ ಮರುಪಾವತಿಸದ ಆರೋಪ
ಕೇಂದ್ರ ಸರ್ಕಾರ ರಿಯಲ್‌ ಮನಿ ಗೇಮ್ಸ್‌ ನಿಷೇಧಿಸಿದ ನಂತರವೂ ವಿನ್‌ಜೋ ಕಂಪನಿಯು ಗ್ರಾಹಕರಿಗೆ ಹಣ ಮರುಪಾವತಿ ಮಾಡದೆ 43 ಕೋಟಿ ರೂ. ಬಾಕಿ ಉಳಿಸಿಕೊಂಡಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಕಂಪನಿಯು ಹಲವಾರು ಅಪರಾಧ ಮತ್ತು ಅನಧಿಕೃತ ಚಟುವಟಿಕೆಗಳಲ್ಲಿ ತೊಡಗಿದ್ದುದಾಗಿ ಇಡಿ ಸ್ಪಷ್ಟಪಡಿಸಿದೆ.
- ಸಾಫ್ಟ್ವೇರ್ ಮೋಸ – ಗ್ರಾಹಕರನ್ನು ತಪ್ಪಾಗಿ ನಂಬಿಸಿದ ಸಂಸ್ಥೆ
ಕಂಪನಿಯು ಗ್ರಾಹಕರು ಮನುಷ್ಯರೊಂದಿಗೆ ಆಟವಾಡುತ್ತಿದ್ದಾರೆ ಎಂದು ಭಾವಿಸುವಂತೆ ಮಾಡಿ, ವಾಸ್ತವದಲ್ಲಿ ಸಾಫ್ಟ್ವೇರ್ ವಿರುದ್ಧವೇ ಬೆಟ್ಟಿಂಗ್‌ ನಡೆಸಿಸುತ್ತಿತ್ತು. ಈ ವಿಷಯವನ್ನು ಸಂಸ್ಥೆ ಗ್ರಾಹಕರಿಗೆ ಮುಚ್ಚಿಟ್ಟಿದ್ದುದಾಗಿ ತನಿಖೆ ತಿಳಿಸಿದೆ.
ವಿನ್‌ಜೋ ವ್ಯಾಲೆಟ್‌ಗಳಲ್ಲಿ ಗ್ರಾಹಕರು ಹೊಂದಿದ್ದ ಹಣವನ್ನು ಹಿಂಪಡೆಯುವುದನ್ನೇ ನಿಷೇಧಿಸಿ, ಅವರಿಗೆ ನಷ್ಟ ಉಂಟುಮಾಡಿದ್ದೂ ಪತ್ತೆಯಾಗಿದೆ.
ಕಂಪನಿಯು ಈ ಮೂಲಕ ಗಳಿಸಿದ ಅಕ್ರಮ ಹಣವನ್ನು ವಿವಿಧ ರೂಪಗಳಲ್ಲಿ ಮರೆಮಾಡಿ ಸಂಗ್ರಹಿಸಿದ್ದಾಗಿ ಇಡಿ ಹೇಳಿದೆ.
- ವಿದೇಶಗಳಲ್ಲಿ ಶೆಲ್ ಕಂಪನಿ – 489.90 ಕೋಟಿ ರೂ. ವಹಿವಾಟು
ಇಡಿ ತನಿಖೆಯ ಪ್ರಕಾರ, ಕಂಪನಿಯು ಬ್ರೆಜಿಲ್‌, ಯುಎಸ್‌ಎ, ಜರ್ಮನಿ ಸೇರಿದಂತೆ ಹಲವು ದೇಶಗಳಲ್ಲಿ ರಿಯಲ್‌ ಮನಿ ಗೇಮ್ಸ್‌ ಕಾರ್ಯಾಚರಣೆಗಳನ್ನು ಭಾರತದಿಂದಲೇ ನಿರ್ವಹಿಸುತ್ತಿತ್ತು.
ವಿದೇಶಿ ಹೂಡಿಕೆಗಳ ಹೆಸರಿನಲ್ಲಿ ಭಾರತದಿಂದ ಹೊರದೇಶಕ್ಕೆ ಹಣ ವರ್ಗಾವಣೆ ಮಾಡಿ, ಯುಎಸ್‌ಎ ಮತ್ತು ಸಿಂಗಾಪುರ ಖಾತೆಗಳಿಗೆ ಹಣ ತಿರುಗಿಸಲಾಗಿದೆ.
55 ಮಿಲಿಯನ್‌ ಡಾಲರ್‌ (ಸುಮಾರು 489.90 ಕೋಟಿ ರೂ.) ಮೌಲ್ಯದ ಹಣವನ್ನು ‘ವಿನ್‌ಜೋ ಯುಎಸ್‌ ಇಂಕ್‌ ಡಾಟ್‌’ ಎಂಬ ಬ್ಯಾಂಕ್ ಖಾತೆಯಲ್ಲಿ ಇಡಲಾಗಿದೆ.
ಈ ಖಾತೆಯ ಎಲ್ಲಾ ವ್ಯವಹಾರಗಳನ್ನು ಭಾರತದಿಂದಲೇ ನಡೆಸಲಾಗುತ್ತಿದ್ದು, ಇದು ಶೆಲ್ ಕಂಪನಿ ಎಂದು ಇಡಿ ಅನುಮಾನ ವ್ಯಕ್ತಪಡಿಸಿದೆ.
- ಹಿಂದಿನ ಎಫ್‌ಐಆರ್‌ಗಳ ಆಧಾರದ ಮೇಲೆ ತನಿಖೆ
ಕಂಪನಿಯ ವಿರುದ್ಧ ಈ ಮೊದಲು ವಂಚನೆ, ಗ್ರಾಹಕರ ಖಾತೆ ನಿಷೇಧ, ಪಾನ್‌ ಕಾರ್ಡ್‌, ಕೆವೈಸಿ ದುರುಪಯೋಗ ಮೊದಲಾದ ವಿಷಯಗಳ ಮೇಲೆ ಹಲವಾರು ಎಫ್‌ಐಆರ್‌ಗಳು ದಾಖಲಾಗಿದ್ದವು. ಇವುಗಳ ಆಧಾರದ ಮೇಲೆ ಇಡಿ ತನಿಖೆ ಆರಂಭಿಸಲಾಯಿತು.
ಇಡಿಯಲ್ಲಿ ಪ್ರಕರಣ ಇನ್ನೂ ತನಿಖೆಯಲ್ಲಿದ್ದು, ವಿದೇಶಿ ಹಣ ವರ್ಗಾವಣೆಯ ಬೃಹತ್ ಜಾಲ ಹೇಗೆ ಕೆಲಸ ಮಾಡುತ್ತಿತ್ತು ಎಂಬುದನ್ನು ಬಹಿರಂಗಪಡಿಸಲು ಮುಂದಿನ ವಿಚಾರಣೆ ನಡೆಯಲಿದೆ.
