ನೆಮ್ಮದಿಯ ಬದುಕಿಗೆ ಪೈಗಂಬರರ ಸಂದೇಶ ಸಹಕಾರಿ: ಸಚಿವ ಶಿವಾನಂದ ಪಾಟೀಲ
ಅಪರಾಧಕ್ಕೆ ಸವಾಲು ಕನ್ನಡ ದಿನಪತ್ರಿಕೆ
ಕೊಲ್ಹಾರ : ಮನುಕುಲದ ಉದ್ಧಾರಕ್ಕಾಗಿ ಪ್ರವಾದಿ ಮಹಮ್ಮದ್ ಪೈಗಂಬರರು ಸಾರಿದ ವಿಶ್ವ ಶಾಂತಿಯ ಸಂದೇಶ ಸಾರ್ವಕಾಲಿಕವಾಗಿದೆ. ಹೀಗಾಗಿ ನೆಮ್ಮದಿಯ ಬದುಕಿಗೆ ಸದಾ ಸಹಕಾರಿಯಾಗಿದ್ದು, ಎಲ್ಲರೂ ಪ್ರವಾದಿಗಳು ತೋರಿದ ಮಾರ್ಗದಲ್ಲಿ ನಡೆಯುವ ಅಗತ್ಯವಿದೆ ಎಂದು ಜವಳಿ, ಕಬ್ಬು ಅಭಿವೃದ್ಧಿ, ಸಕ್ಕರೆ ಹಾಗೂ ಕೃಷಿ ಮಾರುಕಟ್ಟೆ ಸಚಿವರಾದ ಶಿವಾನಂದ ಪಾಟೀಲ ಕರೆ ನೀಡಿದರು.
ಭಾನುವಾರ ರಾತ್ರಿ ಕೊಲ್ಹಾರ ತಾಲೂಕಿನ ಕೂಡಗಿ ಗ್ರಾಮದಲ್ಲಿ ಅಂಜುಮನ್ ಸಮಿತಿಯಿಂದ ಹಮ್ಮಿಕೊಂಡಿದ್ದ ಪ್ರವಾದಿ ಮಹಮ್ಮದ್ ಪೈಗಂಬರರ ಈದ್ ಮಿಲಾದ್ ಉನ್ನಬಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು, ಸ್ಥಳೀಯ ಶಹಜಾದೆ ಮಸ್ತಾನ್ ದರ್ಗಾದಲ್ಲಿ ಪವಿತ್ರ ಗಲ್ಲೀಪ್ ಸಲ್ಲಿಸಿ ಮಾತನಾಡಿದ ಅವರು, ಜಗತ್ತಿನ ಎಲ್ಲ ಜನರು ಅನುಭವಿಸುತ್ತಿರುವ ಸಮಸ್ಯೆ, ಸಂಕಷ್ಟಗಳಿಗೆ ಪ್ರವಾದಿ ಮಹಮ್ಮದ್ ಪೈಗಂಬರರು ಸೂಕ್ತ ಪರಿಹಾರ ಸೂತ್ರಗಳನ್ನು ನೀಡಿದ್ದಾರೆ ಎಂದರು.
ನಮ್ಮ ನಿತ್ಯ ಬದುಕಿನಲ್ಲಿ ಪ್ರವಾದಿಗಳು ಸಾರಿದ ಧರ್ಮ ಮಾರ್ಗದ ತತ್ವಗಳನ್ನು ಅಳವಡಿಸಿಕೊಂಡು ಮುನ್ನಡೆದರೆ ಸುಂದರ ಬದುಕು ರೂಪಿಸಿಕೊಳ್ಳಲು ಸಾಧ್ಯವಿದೆ. ಹೀಗಾಗಿ ಎಲ್ಲರೂ ಮನುಕುಲದ ಉದ್ಧಾರಕ್ಕಾಗಿ ಪೈಗಂಬರರು ತೋರಿದ ಮಾರ್ಗದಲ್ಲಿ ಸಾಗಬೇಕಿದೆ ಎಂದರು.
ಕರ್ನಾಟಕದ ಜಮಾಅತೆ ಅಹ್ಲೇ ಸುನ್ನತ್ ರಾಜ್ಯಾಧ್ಯಕ್ಷರಾದ ಸೈಯದ್ ಶಹಾ ಮಹಮ್ಮದ್ ತನ್ವೀರ ಹಾಶ್ಮಿ, ಬಾಗಲಕೋಟೆ ಜಿಲ್ಲಾಧ್ಯಕ್ಷ ಖಾರಿ ಸಮೀಉಲ್ಲಾ ಖಾದ್ತಿ, ಹೈದರಾಬಾದಿನ ಮೌಲಾನಾ ಅಹ್ಮದ್ ನಕ್ಸ್ ಬಂದಿ, ಕೂಡಗಿ ಅಂಜುಮನ್ ಇಸ್ಲಾಂ ಅಧ್ಯಕ್ಷ ಖಾಸೀಮಸಾಬ್ ಕೊಡಗಾನೂರ, ಹೆಸ್ಕಾಂ ಅಧ್ಯಕ್ಷರಾದ ಸೈಯದ್ ಅಜೀಮಪೀರ ಖಾದ್ರಿ, ವಿಜಯಪುರದ ಹಮೀದ್ ಮುಶ್ರೀಫ್, ಕೊಲ್ಹಾರ ಎಂ.ಬಿ.ಅಲ್ಲಾಭಕ್ಷ ಬಿಜಾಪುರ, ಬಾಗಲಕೋಟೆಯ ದಾದಾಪೀರ ಮುಜಾವರ, ಇಲಕಲ್ಲನ ಅಲ್ ಹಜ್ ಮಹಮ್ಮದ್ ಯುಸೂಫ್ ಬಾಗವಾನ, ಮಿರಾಜ್ ಪಿರಾನ್ ಮದನಿ ಜಹಗೀರದಾರ, ಗೊಳಸಂಗಿಯ ತಜಮುಲ್ ಖಾದ್ರಿ ಜಹಗೀರದಾರ, ಕೊಲ್ಹಾರದ ಅಲ್ ಹಜ್ ಅಲ್ಲಾಭಕ್ಷ ಗಿರಿಗಾವಿ, ಕೊಲ್ಹಾರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಮಹಮ್ಮದ್ ರಫೀಕ್ ಪಕಾಲಿ, ಇಲಕಲ್ಲನ ಅಲ್ ಹಜ್ ಅಬ್ದುಲ್ ರಜಾಕ್ ತಟಗಾರ, ಸಿಂದಗಿ ಮಹಮ್ಮದ್ ಪಟೇಲ್ ಬಿರಾದಾರ, ಖಾಸೀಂ ಪಟೇಲ್ ಸೇರಿದಂತೆ ಇತರರು ವೇದಿಕೆ ಮೇಲೆ ಉಪಸ್ಥಿತರಿದ್ದರು.
