ಜ. 30 ರಿಂದ ಶ್ರೀ ಕ್ಷೇತ್ರ ಇಂಚಗೇರಿ ಮಠದಲ್ಲಿ ಮಾಘ ಸಪ್ತಾಹ ಆರಂಭ

ವಿಜಯಪುರ : ಜಿಲ್ಲೆಯ ಚಡಚಣ ತಾಲ್ಲೂಕಿನ ಭಾವೈಕ್ಯತೆಯ ತಾಣ ಶ್ರೀ ಕ್ಷೇತ್ರ ಇಂಚಗೇರಿ ಮಠದಲ್ಲಿ ಶ್ರೀ ಸ.ಸ ಭಾವೂಸಾಹೇಬ ಮಹಾರಾಜರ 111 ನೇ ಪುಣ್ಯ ಸ್ಮರಣೋತ್ಸವ, ಶ್ರೀ ಸಮರ್ಥ ಸದ್ಗುರು ಗಿರಿಮಲ್ಲೇಶ್ವರ ಮಹಾರಾಜರ, ಶ್ರೀ ಸಮರ್ಥ ಸದ್ಗುರು ಐನಾಥಪ್ರಭು ಮಹಾರಾಜರ, ಶ್ರೀ ಸಮರ್ಥ ಸದ್ಗುರು ಗುರುಪುತ್ರೇಶ್ವರ ಮಹಾರಾಜರ ಹಾಗೂ ಶ್ರೀ ಸಮರ್ಥ ಸದ್ಗುರು ಜಗನ್ನಾಥ ಮಹಾರಾಜರ ಪುಣ್ಯತಿಥಿ ಆಧ್ಯಾತ್ಮ ಸಪ್ತಾಹವು ಜನೆವರಿ 30 ರಿಂದ ಫೆಬ್ರುವರಿ 02 ರವರೆಗೆ 4 ದಿನಗಳವರೆಗೆ ನಡೆಯಲಿದೆ.  

ಜನೆವರಿ 30 ರಂದು ಶ್ರೀಮಠದ ಪೀಠಾಧಿಪತಿ ಶ್ರೀ ಸಮರ್ಥ ಸದ್ಗುರು ರೇವಣಸಿದ್ದೇಶ್ವರ ಮಹಾರಾಜರ ಅಮೃತ ಹಸ್ತದಿಂದ  ಶ್ರೀಮಠದಲ್ಲಿರುವ ವಿವಿಧ ಶ್ರೀಗುರುಗಳ ಗದ್ದುಗೆಗಳಿಗೆ ಪೂಜೆ, ಶೇಜಾರತಿ ಹಾಗೂ ಶ್ರೀ ಸಮರ್ಥ ರಾಮದಾಸ ಮಹಾರಾಜರ ದಾಸಬೋದ ಮತ್ತು ವೀಣಾ ಪೂಜೆಯೊಂದಿಗೆ ಸಪ್ತಾಹ ಆರಂಭಗೊಳ್ಳಲಿದೆ.

ಫೆ.02 ರಂದು ಅದ್ದೂರಿಯ ರಥೋತ್ಸವ ಹಾಗೂ ಪಲ್ಲಕ್ಕಿ ಉತ್ಸವ ಜರುಗಿ ನಂತರ ರೇವಣಸಿದ್ದೇಶ್ವರ ಮಹಾರಾಜರ ಆಶಿರ್ವಚನ ಹಾಗೂ ಪುಷ್ಪ ವೃಷ್ಠಿಯೊಂದಿಗೆ ಮಂಗಲಗೊಳ್ಳುವದು.  

ಈ ಮಾಘ ಸಪ್ತಾಹದ ಅಂಗವಾಗಿ ವಿವಿಧ ಆಧ್ಯಾತ್ಮಿಕ ಕಾರ್ಯಕ್ರಮ ಜರುಗಲಿವೆ. ಈ ಸಪ್ತಾಹದಲ್ಲಿ ವಿವಿಧ ಮಠಾಧೀಶರು,ಸಾಹಿತಿಗಳು, ರಾಜಕೀಯ ಮುಖಂಡರು, ಜನಪದ ಕಲಾವಿದರು, ಸರ್ವೋದಯ ಧುರೀಣರು ಭಾಗವಹಿಸುವ ಈ ಪುಣ್ಯಸ್ಮರಣೆ ಸಪ್ತಾಹ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಹುಬ್ಬಳ್ಳಿ, ಕಲಬುರ್ಗಿ, ಖವಟಕೊಪ್ಪ, ಆಥಣಿ, ಕನ್ನಾಳ, ಕೊಟ್ಟಲಗಿ, ತೆಲಸಂಗ ಹಾಗೂ ಮಹಾರಾಷ್ಟ್ರದ ಗಮಹಿಂಗ್ಲಜ,ಖೋಜಾನವಾಡಿ, ನಂದೇಶ್ವರ, ವಳಸಂಗ, ಜುನೋನಿಯಿಂದ  ದಿಂಡಿ ಪಲ್ಲಕ್ಕಿ ಪಾದಯಾತ್ರೆಯ ಮೂಲಕ ಹಾಗೂ ಕರ್ನಾಟಕ -ಮಹಾರಾಷ್ಟ್ರದ ಮತ್ತು ವಿವಿಧ ವಿದೇಶಗಳಲ್ಲಿರು ಶ್ರೀಮಠದ ಭಕ್ತರು. ದೇಶದ ನಾನಾಕಡೆಗಳಿಂದ ಸಹಸ್ರಾರು ಭಕ್ತರು ಆಗಮಿಸುವರು. 

ಅತ್ಯಂತ ವೈಶಿಷ್ಟ್ಯ ಪೂರ್ಣವಾಗಿ ಜರಗುವ ಈ ಆಧ್ಯಾತ್ಮಿಕ ಸಪ್ತಾಹದಲ್ಲಿ ಭಾಗವಹಿಸುವ ಮೂಲಕ ಶ್ರೀ ಸದ್ಗುರುಗಳ ಕೃಪೆಗೆ ಪಾತ್ರರಾಗಬೇಕಾಗಿ ಶ್ರೀಮಠದ ಭಕ್ತ

ಭಾರತೇಶ ಹಾಸಿಲಕರ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.