ಸಂಭ್ರಮ ಶನಿವಾರ- ಮಕ್ಕಳಿಗೆ ಪ್ರತಿಜ್ಞಾ ವಿಧಿ ಬೋಧನೆ

ಆಲಮಟ್ಟಿ : ಸಂಭ್ರಮ ಶನಿವಾರ 2025-26 ರನ್ವಯ ಶಾಲಾ ಮಕ್ಕಳು ಸೇರಿದಂತೆ ಶಿಕ್ಷಕರಿಗೆ ವಿಶೇಷ ಪ್ರತಿಜ್ಞಾ ವಿಧಿ ಸ್ಥಳೀಯ ಆರ್.ಬಿ.ಪಿ.ಜಿ.ಹಳಕಟ್ಟಿ ಪ್ರೌಢಶಾಲೆಯಲ್ಲಿ ಶನಿವಾರ ಬೋಧಿಸಲಾಯಿತು.

      ಪ್ರತಿಜ್ಞಾ ವಿಧಿ ಬೋಧಿಸಿದ ಮುಖ್ಯ ಶಿಕ್ಷಕ ಜಿ.ಎಂ.ಕೋಟ್ಯಾಳ, ಸಮಾಜದಲ್ಲಿ ಅದರಲ್ಲೂ ಶಾಲೆಗಳ ತರಗತಿ ಕೋಣೆಗಳಲ್ಲಿ ವಿಶೇಷ ಅಗತ್ಯತೆಯುಳ್ಳ ಮಕ್ಕಳ ಸಂಖ್ಯೆ ಇತ್ತೀಚಿನ ದಿನಗಳಲ್ಲಿ ಅಧಿಕಗೊಳ್ಳುತ್ತಲ್ಲಿದೆ. ಇತರೆ ಮಕ್ಕಳು ವಿಶೇಷ ಅಗತ್ಯತೆಯುಳ್ಳ ವಿದ್ಯಾರ್ಥಿಗಳೊಡನೆ ಉತ್ತಮ ಸಂಬಂಧ ಬೆಳೆಸಿಕೊಂಡು ಶೈಕ್ಷಣಿಕ ಮತ್ತು ಸಾಮಾಜಿಕವಾಗಿ ಪರಸ್ಪರ ತೊಡಗಿಸಿಕೊಳ್ಳುವಂತೆ  ವಿಶಾಲಭಾವಮನದ ಅವಕಾಶ ಸೃಜಿಸಬೇಕಾಗಿದೆ.ಉತ್ತಮ ಪ್ರಜೆಯಾಗಿ ಸಮಾಜದಲ್ಲಿ ಸಮಾನತೆ ತರುವಲ್ಲಿ ನಾವುಗಳೆಲ್ಲ ಪ್ರತಿಜ್ಞೆ ಗೈಯೋಣ ಎಂದರು.

          ದೈಹಿಕ ಅಂಗವೈಕಲ್ಯತೆ, ಶ್ರವಣ ನ್ಯೂನತೆ, ಮಾತು ಹಾಗೂ ಭಾಷಾ ಸಂವಹನ ದೋಷ, ದೃಷ್ಟಿ ನ್ಯೂನತೆ ಮತ್ತು ನಿಧಿ೯ಷ್ಟ ಕಲಿಕಾ ನ್ಯೂನತೆಗಳಂತಹ ಇತರೆ ವಿಶೇಷ ಅಗತ್ಯತೆಯುಳ್ಳ ಮಕ್ಕಳಿಗೆ ನಾವುಗಳು ಸಮರ್ಪಕ ಸಹಾಯಹಸ್ತ ಗೈಯುವ  ಸಂಕಲ್ಪ ಮಾಡೋಣ ಎಂದರು.

       ಶಾಲೆಯಲ್ಲಿ ಹಾಗೂ ತರಗತಿಯಲ್ಲಿ ವಿಶೇಷ ಅಗತ್ಯತೆಯುಳ್ಳ ಮಕ್ಕಳಿಗೆ ಬೇಕಾಗಿರುವುದು ಅವಕಾಶವೇ ಹೊರತು ಅನುಕಂಪವಲ್ಲ. ಕಾರಣ ಅವರಿಗೆ ಅವಕಾಶಗಳನ್ನು ಒದಗಿಲು ಪ್ರಯತ್ನಿಸೋಣ. ವಿಶೇಷ ಅಗತ್ಯತೆಯುಳ್ಳ ಮಕ್ಕಳನ್ನು ಯಾವ ಕಾರಣಕ್ಕೂ ಗೇಲಿ ಮಾಡುವುದಾಗಲಿ, ಛೇಡಿಸುವುದಾಗಲಿ ಮಾಡದೇ ಅವರಿಗೆ ಪ್ರೀತಿ,ಕಾಳಜಿ ಮತ್ತು ಗೌರವಭಾವ ತೋರೋಣ. ಜೊತೆಗೆ ಇತರ ಸ್ನೇಹಿತರು ಹಾಗೂ ಕುಟುಂಬದವರಿಗೂ ಈ ಅರಿವನ್ನು ಮೂಡಿಸೋಣ.ಈ ಮಕ್ಕಳಿಗೆ ಅವಶ್ಯಕ ಸೌಲಭ್ಯಗಳನ್ನು ಒದಗಿಸಲು ಪ್ರಾಮುಖ್ಯತೆ ನೀಡೋಣ ಎಂದು ಪ್ರತಿಜ್ಞಾ ವಿಧಿ ಬೋಧಿಸಿದರು.

      ಶಿಕ್ಷಕ ಎನ್.ಎಸ್.ಬಿರಾದಾರ, ಎಸ್.ಎಚ್.ನಾಗಣಿ, ಜಿ.ಆರ್.ಜಾಧವ, ಆರ್.ಎಂ.ರಾಠೋಡ, ಎಂ.ಬಿ.ದಶವಂತ, ಎಲ್.ಆರ್.ಸಿಂಧೆ, ಶ್ರೀಧರ ಚಿಮ್ಮಲಗಿ, ಸಚೀನ ಹೆಬ್ಬಾಳ, ಶಾಂತೂ ತಡಸಿ ಇತರರಿದ್ದರು.