ಕಲ್ಲಿನ ಮೇಲೆ ಕೆತ್ತಿದ ಕನಸು

ಅಪರಾಧಕ್ಕೆ ಸವಾಲು ಕನ್ನಡ ದಿನಪತ್ರಿಕೆ

• ಬದುಕು ಕಲಿಸಿದ ಪಾಠಗಳು ಭಾಗ - 01

ಮಲ್ಲೇಶ ಎಂಬ ಹುಡುಗ ಸಣ್ಣ ಹಳ್ಳಿಯ ಬಡ ಮನೆಗೆ ಜನಿಸಿದ್ದರೂ, ಅವನ ಕನಸುಗಳು ಬಡತನಕ್ಕಿಂತಲೂ ಬಹಳ ದೊಡ್ಡವು. ತಂದೆ ಕಲ್ಲು ತೋಡಿ ಜೀವನ ನಡೆಸುವ ಕೂಲಿ ಕಾರ್ಮಿಕ. ತಾಯಿ ಮನೆಯ ಕೆಲಸಗಳಲ್ಲಿ ತೊಡಗಿಕೊಂಡ ಸರಳ ಗೃಹಿಣಿ. ಬದುಕು ಕಠಿಣ ಆದರೆ ಮಲ್ಲೇಶನ ಮನಸ್ಸು ಮಣ್ಣಿಗಿಂತ ಗಟ್ಟಿಯಾಗಿತ್ತು.

ಹಳ್ಳಿಯವರಿಗಂತೂ ಅವನ ಕನಸು ನಕ್ಕು ನೋಡುವ ವಿಷಯ:

“ಕಲ್ಲು ಹೊರುವವನ ಮಗ ಇಂಜಿನಿಯರ್ ಆಗ್ತಾನಾ?”

ಆದರೆ ಮಲ್ಲೇಶ ಕೇಳುತ್ತಿರಲಿಲ್ಲ; ಕೇಳಿದರೂ ಮನಸ್ಸಿಗೆ ಹಾಕುತ್ತಿರಲಿಲ್ಲ.

ಬೆಳಿಗ್ಗೆ ತಂದೆಯ ಜೊತೆ ಕಲ್ಲು ಹೊರುವ ಕೆಲಸ, ಮಧ್ಯಾಹ್ನ ಶಾಲೆ, ರಾತ್ರಿ ಓದು ಅವನ ಪ್ರತಿದಿನದ ಹೋರಾಟ. ಕೈಗಳಲ್ಲಿ ಕಲ್ಲಿನ ಧೂಳು ಇರ್ತಿದ್ದರೂ ಮನಸ್ಸಿನಲ್ಲಿ ಬೆಳಕಿನ ಕನಸು ಇದ್ದಿತು. ಗಣಿತ ಕಲಿಯುವಾಗ ಅವನು ಅಂಕೆಗಳನ್ನೇ ತನ್ನ ಮೇರೆಯ ಮೆಟ್ಟಲುಗಳಂತೆ ನೋಡುತ್ತಿದ್ದ.

ಒಮ್ಮೆ ಶಾಲೆಯಲ್ಲಿ ಗುರುಗಳು ಹೇಳಿದ ಮಾತು ಅವನ ಬದುಕಿನ ದಿಕ್ಕು ಬದಲಿಸಿತು:

“ಪ್ರತಿಯೊಂದು ದೊಡ್ಡ ಸಾಧನೆಯ ಹಿಂದೆ ಸಣ್ಣ ಸಣ್ಣ ಹೋರಾಟಗಳಿರುತ್ತವೆ.”

ಈ ಮಾತೆ ಮಲ್ಲೇಶನ ಮನಸ್ಸಿನಲ್ಲಿ ಶಿಲೆಯ ಮೇಲೆ ಕೆತ್ತಿದಂತೆ ಶಾಶ್ವತವಾಯಿತು.

10ನೇ ತರಗತಿಯಲ್ಲಿ ಪಾಠಪುಸ್ತಕಗಳಿಗೆ ಹಣವಿಲ್ಲದೆ ಆತ ಅಳುತ್ತಿದ್ದ. ಅದೇ ವೇಳೆ ತಂದೆಯು ಅವನಿಗೆ ಕೇಳದ ಪ್ರೇರಣೆಯನ್ನು ನೀಡಿದರು:

“ನಿನಗೂ ಈ ಬದುಕಿನಲ್ಲಿ ಕನಸು ಕಾಣುವ ಹಕ್ಕು ಇದೆ… ನಾನು ಇನ್ನೂ ಕಲ್ಲು ಹೊರುತ್ತೇನೆ.”

ಆ ಮಾತು ಮಲ್ಲೇಶನ ಕನಸಿಗೆ ಹೊಸ ಜ್ವಾಲೆ.

ಮತ್ತು ನಂತರ 10ನೇ ತರಗತಿಯಲ್ಲಿ ಹಳ್ಳಿಯ ಪ್ರಥಮ   ಸ್ಥಾನ.

PUC ಗೆ ನಗರಕ್ಕೆ ಬಂದಾಗ ಜೀವನ ಮತ್ತಷ್ಟು ಕಠಿಣ. ಕೆಲ ದಿನ ಅನ್ನವಿಲ್ಲದೆ, ಊಟವಿಲ್ಲದೆ ಓದುತ್ತಿದ್ದ. ಆದರೆ ಮಲ್ಲೇಶನ ಕನಸು ಮಳೆಯಲ್ಲಿ ಕರಗುವ ಕಾಗದದಲ್ಲಿರಲಿಲ್ಲ; ಕಲ್ಲಿನ ಮೇಲೆ ಕೆತ್ತಿದ ಹಾಗೆ ಗಟ್ಟಿಯಾಗಿತ್ತು. ಕೆಲಸ ಓದು… ಓದು ಕೆಲಸದ ನಡುವೆ ದಿನಗಳು ಮುಂದುವರಿಯುತ್ತವೆ.

ಇಂಜಿನಿಯರಿಂಗ್ ಪ್ರವೇಶ ದೊರಕಿದಾಗ ಶುಲ್ಕದ ಸಂಕಷ್ಟದ ನಡುವೆಯೂ ಮಲ್ಲೇಶ ತನ್ನ ಸಂಗ್ರಹಿಸಿದ ಹಣ, ಮಾಡಿದ ಸಣ್ಣ ಕೆಲಸಗಳ ಸಂಬಳ, ವಿದ್ಯಾರ್ಥಿವೇತನ      ಇವೆಲ್ಲ ಸೇರಿಸಿ ತನ್ನ ಕನಸುಗಳಿಗೆ ಬಾಗಿಲು ತೆರೆದ.

ಕಾಲೇಜಿನ ನಾಲ್ಕು ವರ್ಷಗಳು ಹೋರಾಟ, ಕಣ್ಣೀರು ಮತ್ತು ನಂಬಿಕೆಯ ಸಂಧಿ. ಕೆಲವೊಮ್ಮೆ ತೊಳಲಾಡಿದರೂ, ಅವನಿಗೆ ಒಂದು ಶಬ್ದ ಸದಾ ಪ್ರೇರಣೆ:

ತಂದೆ ಹೊಡೆಯುತ್ತಿರುವ ಕಲ್ಲಿನ ಬೇಟಿನ ಧ್ವನಿ…

ಅದೇ ಅವನಿಗೆ ಶಕ್ತಿ.

ಕ್ಯಾಂಪಸ್ ಸಂದರ್ಶನದ ದಿನ—ಮಲ್ಲೇಶ ತನ್ನ ಹೋರಾಟವನ್ನು ಹೇಳಿದಾಗ, ಕಂಪೆನಿಯ ಅಧಿಕಾರಿಗಳು ಪ್ರಭಾವಿತರಾದರು:

“ ನೀನು ಕಲ್ಲು ಹೊರುವವನ ಮಗ ಅಲ್ಲ ಮಲ್ಲೇಶ

ನಿನ್ನ ಮನಸ್ಸೇ ಇಂಜಿನಿಯರ್. ನೀನು ಆಯ್ಕೆಗೊಂಡೆ”

ಆ ಸುದ್ದಿ ಕೇಳಿದ ಕ್ಷಣದಲ್ಲಿ ತಂದೆಯ ಕೈಯಲ್ಲಿ ಕಲ್ಲು ನೆಲಕ್ಕೆ ಬಿದ್ದಿತ್ತು…

ತಾಯಿಯ ಕಣ್ಣೀರು ಮಲ್ಲೇಶನ ಸಾಧನೆಗೆ ಹೂ ಹಚ್ಚಿದಂತಾಯಿತು.

ಇಂದು ಮಲ್ಲೇಶ ದೊಡ್ಡ ಕಂಪನಿಯಲ್ಲಿ ಇಂಜಿನಿಯರ್.

ತಂದೆ ಇನ್ನೆಂದಿಗೂ ಕಲ್ಲು ಹೊರುವುದಿಲ್ಲ.

ಮಲ್ಲೇಶ ಬದುಕೇ ಹೇಳುತ್ತಿದೆ—

“ಕಲ್ಲನ್ನು ಕೆಲವರು ಅಡ್ಡಿ ಎನ್ನುತ್ತಾರೆ; ನಾನು ಅದನ್ನೇ ಮೆಟ್ಟಲಾಗಿಸಿದೆ.”

ಜೀವ ಪಾಠ:

ಕನಸುಗಳನ್ನು ಕಾಗದದಲ್ಲಿ ಬರೆಯುವುದಕ್ಕಿಂತ,

ಜೀವನದ ಕಲ್ಲಿನ ಮೇಲೆ ಕೆತ್ತಿದಾಗ

ಅವು ನಿಜವಾಗುತ್ತವೆ.

ಪರಿಸ್ಥಿತಿ ಕಠಿಣವಾದರೂ,

ನಮ್ಮ ನಂಬಿಕೆ ಶಿಲೆಯಂತೆ ಗಟ್ಟಿ ಇರಬೇಕು.

ಲೇಖಕರು:

ಪ್ರಶಾಂತ ಕುಲಕರ್ಣಿ ಉಪನ್ಯಾಸಕರು

ಶ್ರೀ ಪದ್ಮರಾಜ ಬಿ.ಇಡ್ ಕಾಲೇಜು, ಸಿಂದಗಿ.